महानेता / हरीकान्त
वात मां वहन्दड़ ॻोढ़ा
या अखियुनि मां ॻरन्दड़ गिग ई काफ़ी आहे
सादिड़ियुनि दिलियुनि खे आले बणाइण लाइ
नाबालिग़ मुल्कनि लाइ ख़ास तौर
लाज़मी थीन्दो आहे
क़ौमी झण्डे
ऐं क़ौमी राॻ वांगुर लॻ भॻ क़ौमी अबो
उर्फ़ महानेता
यानी आम सभाउनि में
मसीहाउनि जो नक़ाब चाढ़े ईन्दड़
सिकीलधनि शैताननि लाइ
सॼो सही थियलु ख़ाली चेक बुक
महानेता जी आत्मा खे ईजाउ
पहुचण जी धमकी उछिलाए
कैश कराए सघे जेतिरी बि हमदर्दी
थोरिडी आहे
जनता ॾाढी भोरिड़ी आहे।
उहे, जेके देश लाइ लड़िया हुआ
ऐं उहेई जेके देश सां पिया लड़नि
साॻियुनि वरदियुनि में साॻियनि हथियारनि सां
वरी पहुची विया आहिनि मंच ते शोभा वधाइण
चालाक चेहरनि ते मासूमिखत चंबुड़ाए
हड़ई हरामपायूं बहाल कराइणु
साणु पंज सालो ठेको कमाइणु
मुल्क खे गिरवी रखी आत्म कल्याण
करा वारनि हिन दफे़
कुझु नवां सिका उछिलाया आहिनि
सिके सिके जे पुठीअ ते
नवां वादा उकिराया आहिनि:
सभिनी लाइ भरपेट गाहु
सब्जु इंक़लाब जो प्रसाद
सभिनी लाइ पका तबेला
आराम सां आराम फ़रमाइणु, नसुल वधाइनि
ऐं लिॾि लाहिण लाइ वगै़रह वगै़रह
अध-मुआ अवाम
झुकी झुकी सिका चुॻे रहिया आहिनि
मुअल आवाज़नि में हिणकारीन्दे
महा नेता ज़िंदाबाद
