महाभारत / ईश्वर आँचल
ही छा आहे?
मुंहिंजीअ वीचारधारा खे
थियो छा आहे!
लॻेमि थो त कंहिं दिल सां
बारु ॿधी छॾियो आ!
हिक ॿाट मुंहिंजे अन्तःकरण ते छांइजी,
बर्फ़ जहिड़ी सख़्तु थी वेई आहे;
कुझु बि सोचे-करे नथो सघां;
अहिड़ी बेहिसीअ जो व्यूह चक्र टोड़े,
आंउ ॿाहिरि अचणु चाहियां थो!
मां
जेको निडरता ऐं सचाईअ जो
पुतलो आहियां,
अॼु कूड़ ऐं कपट जे तीरनि सां
घाइजी मरन्दुसि!
मां अकेलो आहियां,
पर हू आहिनि सवें हज़ारें;
बेशुमार हथियारबंद!
पर जेसताईं जीअरो आहियां
लड़ाई जारी रखन्दुसि;
जेतोणीकि ॼाणां थो त कूड़
सदाईं सच जो,
सीसु झुकायो आहे!
महाभारत बि त कूड़ कपट जी
कहाणी आहे!
शुरूआति में कूड़
सच खे दोलाबु ॾिनो;
अन्त में सच बि कूड़ खे,
ठॻीअ सां ई मारियो!
हर हालत में जीत
कूड़ ऐं कपट जी थी!
कौरव वीरता सां युद्ध जे मैदान में मुआ;
पांडव वुर्ग जी यात्रा कन्दे,
हिकु हिकु थी किरिया, मुआ!
सच जी जुड़ितू जय ॾेखारण लाइ,
चतुर व्यास युधिष्ठिर खे,
नरक-सुर्ग ताईं पहुचायो!
व्यास जे विवेक
युधिष्ठिर खे सिधो
सुर्ग में वठी वञण खां
इनकारु कयो।
पर जेसताईं जीअरो आहियां
लड़ाई जारी रखन्दुसि;
हू (व्यास) युधिष्ठिर खे,
पहिरीं नरक जो दर्शनु कराए
पोइ सुर्ग में वठी वियो!
बाक़ी बहानेबाज़ी आहे इहा
त नरकवासियुनि खे आनन्दु ॾियण काणि,
युधिष्ठिर पहिरीं उते वियो!
व्यासु होशियार लेखकु हो,
तंहिं करे एतिरो कुझु लिखण खां पोइ पिणि,
महाभारत खे केरु बि
कूड़ जी कथा नथो चवे!
अॼु भारत भूमीअ जे
ॻोठ ॻोठ में,
पाड़े पाड़े में,
हिकु नओं महाभारत पियो रचिजे!
कौरव छिता
छुड़वाॻ पिया फिरनि;
द्रोणाचार्यु
गुंडनि जो सरदारु बणियो आहे;
परम पितामहु
कूड़ जो नमकु खाई
गुंडनि जो साथु ॾियण लाइ
हरदम हाज़िर आहे!
फ़र्कु हिकु ॿियो बि आहे
कलिजुॻ में
कौरवनि जी कौरवनि सां
युद्ध जारी आहे!
कलिजुॻ जे महाभारत जी कहाणी
चोरनि मथां महाचोरनि जे जीत जी
कहाणी आहे!
नयूं नयूं चाॿियूं
नवंनि नवंनि कुल्फ़नि लाइ
ईजाद थियूं आहिनि;
हराम जी कमाईअ ते
हाज़मो हिरियो आहे।
ईमानदारीअ जी कमाईअ मां
पेटु नथो भरिजे!
शब्दनि जे चतुराईअ जो राॼु ज़ोर आहे
खोखला वउज़ चंद लोकनि जे
पेट भराईअ जो सबूत आहिनि।
चोरी टॻी ज़नाउ ज़ोर कन्दड़
कारे नाणे जे छट हेठि
इज़्ज़तदार बणिया आहिनि!
सत्ताधारी पंहिंजी अहिड़ीअ सोभ ते
ख़ुद फ़िदा थी,
शदमद सां जीए पियो!
पाप जो ज़हरीलो नांगु
संदसि गले में
सुन्दर हार मिसल
चिमके पियो!
पुञ जो मफ़हूमु
फिरी वियो आहे;
पवित्रता जा कमज़ोर नेण
पाप जे तेज़ रोशनीअ में
बन्द थी विया आहिनि!
धनवान दोलाब सां धनु कमाए,
इज़्ज़तदार थी,
बुखियनि डुखियनि ऐं
लाचार गलनि मां
‘सत्यमेव जयते’ जे नारे जी
कूड़ी गूंज ॻाराए रहिया आहिनि
हीउ हिन युग में, हिन देस जी कहाणी आहे
हू हुन युग में, हुन देस जी कहाणी आहे
कहाणी साॻी आहे, पर अदाकार ॿिया आहिनि।
