चेट:
चाहु रखी तूं चेट में करि साधनि जो संगु
निकिरी वेंदइ मन मां इहो कूड़ कपट जो ढंगु।
परिची डींदुइ प्रेम सां, आतम धनु ‘अखंडु।
लॻी वेन्दइ रंगु - सुततु पोइ सरूप जो॥
वेसाख:
वेही तूं वेसाख में, भॻत पदु पारी
मिलण जे महबूब जी तूं करीं पोइवारी
हिकु लहरूं लख हज़ार, ॿिया कुन केर कारी
मंज़िल अथई भारी, जपे वठु जॻदीश खे।
लॻी वेन्दइ रंगु...।
ॼेठु:
ॼाणी महिने ॼेठ में, तूं खणु भलाईअ जो पेरु
करे इबादत अलख जी, तूं कढु अंदर मां गै़रु।
कालु छॾींदुइ कीन की, डाहे कंदुइ ढेरु
कीअं थो सॾाईं सेरु, आहीं पाउ बि कीन की!
लॻी वेन्दइ रंगु...।
आखाड़:
आखाड़ में उथी तूं, वञु दूलह जे दरि।
ॿाझ भरायां ॿाझूं करे, तोखे कोठीन्दा घरि।
कूड़ा ख़याल फिटा करे, ख़याल ख़सम जो धरि।
अहिड़ो सौदो करि, जो माणीं सुखु सुहाॻ जो।
लॻी वेन्दइ रंगु...।
सांवणु:
सांवण महिने सिक मूं, शेवियो आतम संसारु।
बिन भॼन भॻवान जे, कूड़ो अथई संसारु।
छॾे वॾाई हठ खे, तूं साझुर पाणु संभारि
इहा दुनिया दौलत साणु, कोॾी न हलंदइ साह सां।
लॻी वेन्दइ रंगु...।
बडो:
पेही तंहिं बडे में तूं पल पल करि पुकार।
पसण काणि पिरियुनि जे, रोउ तूं ज़ारो ज़ार
कढी फिटी करि मन मां, ॿी सभु सार संभार
त मिलंदुइ जानी यारु, मैलि न रहंदइ मन में॥
लॻी वेन्दइ रंगु...।
असू:
असू महिने अची करे तूं कढु अविद्या अंधेरो
परिची लहिजि प्रेम सां, दोस्त जो देरो।
अठई पहर अलख सां, लाहे वेहु झेड़ो
त चौरासीअ फेरो, मिटी वञेई मन मां॥
लॻी वेन्दइ रंगु...।
कती:
कतीअ महिने कूड़ खां पंहिंजो पाणु बचाइ
वठी दामनु दोस्त जो, तूं सचो पलउ पाइ
त जिति-किथि इज़त तुंहिंजी थिए सरासर सवाइ
पोइ थींदइ दिल जाइ, लहन्दो अंदेशो अंदर मां॥
लॻी वेन्दइ रंगु...।
नाहिरी:
निगाह रखी नाहिरीअ में, मुंहिंजी वाहर करि हाणु
हिकु ज़ईफ़ आहियां, ॿियो आहियां अणॼाणु
बुछिड़ो आहियां बेशर्म, भलाई करि भॻवंत पाणु।
ॾे को ख़ास ॾाणु , मिन्थ मञु मिसकीन जी।
लॻी वेन्दइ रंगु...।
पोहु:
पहुची ॾिसु तूं पोह में, केरु अंदर में आहे
फिटी करि पापनि जी, सिर तां भरी लाहे
बिना भॼन हरीअ जे, पाणु विधुइ फासाए
हिते रहणो नाहे, तूं ॻाल्हि करि अंदर जी॥
लॻी वेन्दइ रंगु...।
मांघु:
मांघु महिनो आयो, हलणु थियो मुहालु
कयुमि कोन अंदर में ख़ाविंद जो को ख़यालु
अची पियो ओचितो, सिर ते कल्पत कालु
अहिड़ो बुछिड़ो हालु, बिना भॻितीअ जे थियो।
लॻी वेन्दइ रंगु...।
फॻुणु:
फॻुणु महिनो फूह जो, अथई आम मशहूर
कर्म करि तूं करतार, आहीं बेहद बेमंसूर
मिठा हुजत तो में घणी, तूं आहीं वसीलो वीर
छीहो अथई असीर, बख़्शु ख़ताऊं मुंहिंजूं।
लॻी वेन्दइ रंगु...।