मां ई आहियां तव्हां जी आखि़री उम्मीद / विम्मी सदारंगाणी
मूं खां पुछो त छा थीन्दी आहे दहशत
मूं खां पुछो त छा थीन्दी आहे दहशतगर्दी?
मूं खां पुछो त केरु थीन्दा आहिनि दहशतगर्द?
मां उन पीउ जो पुटु आहियां
जंहिं साहु छॾियो
उन गोलीअ खे गले लॻाए
जेका उन लाइ त कान ठही हुई
हू त हिकु अमन पसन्द शख़्सु हो।
मां उन माउ जो पुटु आहियां
जंहिं फथिकी फथिकी जान ॾिनी
खंघी खंघी अखियूं बूटियाईं
उन्हीअ बंकर में
मां उन लाइ दवा बि न आणे सुघियुसि।
मां उन नंढिड़ीअ भेण जो भाउ आहियां
जेका पेई आहे ज़मीन ते आसमान हेठि
उन जे मथां पियल आहे दहशत जी चादर
ऐं हेठां विछायल आहे बारूदी सुरंग।
हर डप खां बेख़बर
सन्दसि मासूम अखियुनि में समायल आहे
ॿाराणी शरारत
हूअ जाॻन्दड़ अखियुनि सां ख़्वाबु पेई ॾिसे-
माउ जे हंज जो, खीर जो, बिस्कूट जो,
चाकलेट जो, फूकिणनि जो...
मां बि ॾिसां पियो ख़्वाब-
रोटीअ जा, पाणीअ जा, रोशनीअ जा,
सांत हवा जा, खुलियल दरीअ जा...
मां लिको वेठो आहियां हिन कोठिड़ीअ में
गुज़िरियप चइनि ॾींहंनि खां
पंहिंजी नंढिड़ी भेण खे
पंहिंजियुनि ॿांहुंनि में भरे।
केरु त मूं खे बुधाए
सिज जी रोशनी कहिड़ी हून्दी आहे?
चंड जी चांडोकी कहिड़ी हून्दी आहे?
जबल केतिरा ऊचा हून्दा आहिनि?
गुल कहिड़नि रंगनि जा हून्दा आहिनि?
इएं छो थो लॻे मूं खे
त मूं कॾहिं
ॾिठो ई नाहे सिजु, चंडु, जबलु, गुलु...
तव्हीं पुछो था केरु आहियां मां?
कहिड़े मुल्क जो रहवासी आहियां?
त बुधो-
मां ॿारु आहियां हिन्दुस्तान जो
मां ॿारु आहियां पाकिस्तान जो
मां ॿारु आहियां अमेरीका जो
मां ॿारु आहियां अफ़ग़ानिस्तान जो
मां ॿारु आहियां बोसतनिया जो
मां ॿारु आहियां पिलिसताईन जो
मां ॿारु आहियां सॼी दुनिया जो
सॼी दुनिया मुंहिंजी आहे।
केरु न मूं खे बुधाए त
आखि़र उहा कहिड़ी शान्ती आहे
जंहिं खे आणण लाइ
ज़रूरत आहे लड़ाईअ जी!
रत जी! बन्दूक़ जी!
हा, सचु आहे त इन सभ सां
शान्ती ईन्दी हिक ॾींहुं
ऐं उहा हून्दी आखि़री शान्ती।
बस,
बाक़ी हिक ई ॻाल्हि चविणी आहे
अव्हां खे
‘मूं खे मरणु न ॾिजो!
मां ई आहियां अव्हां जी आखि़री उम्मीद...!’
