भारत की संस्कृति के लिए... भाषा की उन्नति के लिए... साहित्य के प्रसार के लिए
माता बणकै बेटी जणकै बण मैं गेर गई / लखमीचंद
Kavita Kosh से
माता बणकै बेटी जणकै बण मैं गेर गई
पत्थर केसा दिल करके नै तज बेटी की मेर गई
नौ महीने तक बोझ मरी और पेट पाड़ कै जाई
लहू की बून्द गेर दी बण मैं शर्म तलक न आई
न्यारी पाट चली बेटी तै करली मन की चाही
पता चल्या न इसी डाण का गई कौणसी राही
ऊंच नीच का ख्याल करया ना धर्म कर्म कर ढेर गई
लड़की का के खोट गर्भ तै लेणा था जन्म जरुरी
नो महीने मैं पैदा हुई और कोन्या उमर अधूरी
इसी मां कै होणा था जो बेअक्कल की कमसहूरी
या जीवै जागै सफल रहै भगवान उमर दे पूरी
जननी बणकै बेटी सेती किस तरियां मुंह फेर गई
मनै ज्यान तै प्यारी लागै पालन पोषण करूं इसका
कती नहीं तकलीफ होण दयूं पेटा ठीक भरूं इसका
पुत्री भाव नेक नीति बण आज्ञाकार फिरूं इसका
शकुन्त पक्षी का पहरा सै तै शकुंतला नाम धरूं इसका
‘लखमीचन्द’ कहै दया नहीं आई दिन मैं कर अंधेर गई
