भारत की संस्कृति के लिए... भाषा की उन्नति के लिए... साहित्य के प्रसार के लिए
मायड़ भासा / कन्हैया लाल सेठिया
Kavita Kosh से
खोसली
लूंठा
जोरामरदी
होठां स्यूं
मिसरी मधरी
म्हारी
मायड़ भासा,
समझली
जनता नै
साव भेड़‘र बकरी
कुण सुणै
बापड़ी रा बोबाड़ा ?
भूखी है‘ क चरी
धायोड़ां नै दिखै
पड़ी
मींगण्यां निरी
बां रै भबूं एकसी
सूखी‘र हरी !
कुरस्यां रा लोभी
चाहीजै बां नै
तफरी
दरड़ै में पड़ो
संसकरती‘र कला
नेतावां नै
लागै मीठा
सत्ता रा गुलगुला,
बांध दी
लिखारां री पूंछ में
बेतुकी
अकादमी
लियां फिरै
भोलिया
आप आप रै
पोथां री डमी,
कठै है नाणां ?
आ ज्यावो कर‘र
रामरमी,
कोन आवै
भोटां रै भूखां नै
बठै तांई
अकल
नही सांभलै
जठै तांई
भासा रै सवाल नै
आखो जनबल !
