भारत की संस्कृति के लिए... भाषा की उन्नति के लिए... साहित्य के प्रसार के लिए
मारव मया के गुलाल / चेतन भारती
Kavita Kosh से
देखो आगेस अरु फागुन तिहार,
अंजुरी भर-भर मारव मया के गुलाल ।
जाड़ के झरती आगे सुग्घर महीना,
झांकत हावे देख रूख म नवा पिका ।
पाके पाना हरियागे धरती के अंचरा ,
भोंगर्रा घला भुलागे, अपन जुन्ना रद्दा।।
चलव नाचव डंडा जमो बनके गुवाल,
तन रचव मन रचव मगन हो गाले फाग ।
तोर परघनी म बइहागे अमुवा लिमुवा,
फूल म लदागे दुल्हा कस बाग-बगीचा ।
पहाती सुकुवा के घला हरगे चेत,
मंदरस के माछी मगन हावे देख ।।
लइका अऊ पिचका जुरो सियान,
पिचकारी पितकव देवव फुहार ।
अइठत गिंजरत हावे कोन गाँव म,
कतको पिये अलसाय परे हावे छाँव म।
चिटिकुन सुख बर बेत झन सांस ल,
मछरी कस फंसे लिल झन फांस ल ।।
आगू ठाढ़े अगोरत हावे बसंत,
चोर से फेंकव गुलाल, उड़जाय मलाल ।
