मेरी बावन गज की बूंद / हरियाणवी
मेरी बावन गज की बूंद सास डीब के बीच धरी हे री डीबे के बीच धरी
ओढ़ पहर पाणी जां सास पाड़छे में आण खड़ी हे री पाड़छे में आण खड़ी
पाणी भर के उल्टी आऊं, सास सन्टर के बीच खड़ी हे री सन्टर के बीच खड़ी
सासू जल्दी सी दौघड़ तार मेरी तो नाड़ी छूट लई हे री नाड़ी छूट लई
बाहरणै ते आया भरतार आज मां किसी खाट घली हे री किसी खाट घली
बेटा कहूं कही ना जा तेरी नोटंकी के नजर हुई तेरी रे नोटंकी नजर हुई
बैदा लेले डेढ़ हजार मेरी नौटंकी नै कर दै खड़ी हे रे नौटंकी करदे खड़ी
बच्चा पीसा ल्यूं ना एक तेरी नौटंकी मरी पड़ी हे रे नौटंकी मरी पड़ी
तनै याके करी भगवान मेरी तो माया लूट लई हे रे माया लूट लई
म्हारी सास केसी जोट आज इकले नै छोड़ चली हे रे इकलै ने छोड़ चली
पिलंग्या पै सोवण आली आज धरती में ल्हास पड़ी हे री धरती में ल्हास पड़ी
तेरा देबी बरगा रूप मुट्ठी भर राख होई हे रे मुट्ठी भर राख होई
