भारत की संस्कृति के लिए... भाषा की उन्नति के लिए... साहित्य के प्रसार के लिए
मोर गंवई गांव / रामेश्वर शर्मा
Kavita Kosh से
नदियां नरवां ढोढ़गा वीच में मोर गंवई गांव हे।
वर पीपर आमा के संगी सरग अइसन छांव हे॥
डोंगरी पहार ले सुरूज़ किरण हा हमर गांव में आथे।
जंगल झाड़ी खेत के वाली झरर-झर झर झराथे।
अइसन सुघ्घर वहे पुरवाही तिहां हमार गांव हे॥
खेत वारी के बेरा हमन नगर बइला ले जाथन ।
लहू पासीं सेच कमाके हीरा मोती उपजाथन ।
अब्बड़ कमइयां हमन भईयां छत्तीसगढ़िया नाव हे॥
राम मड़ईया कस कुरीया ते मा सुख दुख पहावय
बासी खावन परसीया पीयन गूजर बसर दिन जावय।
होरी देवारी रोज मनावन ये जिनगी बार ढांव हे॥
मंदिर देवाला चारो खूंट मन तुलसी चौरा आँगन मं।
बद्री द्वारका जगन्नाथ रामेश्वर अंतस पावन मं।
तीरथ धाम सवो ले बढ़िया दाई ददा के पांव हे॥
