भारत की संस्कृति के लिए... भाषा की उन्नति के लिए... साहित्य के प्रसार के लिए
म्हैं सूं तो काई भली / वासु आचार्य
Kavita Kosh से
रात रात भर
अंधारी रातां रै
गैरै सरणाटे सागै
खदबदीजती रै
मांय री मांय
भर्यै ताळ मांय
सुकड्योड़ी
अमूज्यौड़ी-बा काई
ताकती रै-पूरौ आभो
खीरा दांई लपलावता तारा
काढ़ता-रातीराती आंख्यां
फौड़ती रै माथो
सूनै घाटा
ताळ री भीता
आखी आखी रातां
अर सुबकती रै
आपरै चन्द्रमा री उडीक मांय
म्हैं सोचूं
म्है सूं तो काई भली
जिकै रै हियै जियै
की तो थ्यावस है
चांदण पखरी
चन्द्रमा सूं मिलणै री
अर अठीनै म्हैं
ताकतो रैवूं-गूंगौ आभो
अर पीवतौ रैऊ
हर पल हर छिन्न
दिन अर रात रो अंधारो
गेरौ सरणाटो
