रजवट हंदी रीत / मानसिंह राठौड़
राजन इतरा राखिये,नेह धरम अर नीत।
परमेसर जद पाळसी,रजवट हंदी रीत।।1।।
अंतस मीठा आखरां,पलपल पालूँ प्रीत।
राखण वाळो राखसी,रजवट हंदी रीत।।2।।
समर चढ़ै है सूरमा,गावै गजबण गीत।
जँग जोरावर जीतसी,रजवट हंदी रीत।।3।।
सगती तू सहाय करै,रक्ख पागड़े जीत।
समर लड़तां नित सिरहे,रजवट हंदी रीत।।4।।
रजपूती नित रेवसी,बातां जासी बीत।
नेक करमां निभावजो,रजवट हंदी रीत।।5।।
कूड़ कपट नी केवणो,प्रण'ज लेवो पुनीत।
राज काज नित राखजो,रजवट हंदी रीत।।6।।
रिलमिल भेळा रेवजो,भाँगो भ्रम री भींत।
माता राणी राखसी,रजवट हंदी रीत।।7।।
दुरगे करतब हद कियो,राखण राज अजीत।
दिल्ली जाय दहाडियो,रजवट हंदी रीत।।8।।
चांदा थारी चांदणी,उजास करै अदीत।
आखै जगत'ज ऊजळी,रजवट हंदी रीत।।9।।
संग जमाने चालता,संस्कार रखण चीत।
उजवळ रेसी आपणी,रजवट हंदी रीत।।10।।
पल्लो ओपे पाग रो,पंचरंग है प्रीत।
अनूठी हद'ज ओपती,रजवट हंदी रीत।।11।।
