भारत की संस्कृति के लिए... भाषा की उन्नति के लिए... साहित्य के प्रसार के लिए
रागनी 14 / विजेन्द्र सिंह 'फौजी'
Kavita Kosh से
रोवै मतना ताई री क्यूँ ना दिल अपणा समझावै
अमर होया तेरा लाल री क्यूँ ना गीत खुशी के गावै
देश की खातिर ताई री शहीद होया तेरा लाल
दुश्मन के छक्के छुड़ा दिए री कर दिया उसनै कमाल
मतना रोवै होश सम्भाल-2 ना आख्याँ तै नीर बहावै
जमकै लड़ी लड़ाई री ना वह दुश्मन तै घबराया
लड़ते लड़ते मरग्या ना उनै तेरा दुध लजाया
दुनिया के म्हाँ नाम कमाया-2 हर कोए शीश छुकावै
आवागमन लगा दुनिया म्हं कोए आवै कोए जावै
जिसके होज्या सांस री पूरे उनै कोए बचा ना पावै
क्यूँ ना बावली मन समझावै-2 ना रो-रो रुद्धन मचावै
कहै फौजी विजेन्द्र ताई री तुं भागा आली सै
जिसका ना कोए दुनिया म्हं उंका राम रुखाली सै
दुनिया कि रीत निराली सै-2 क्यूँ ना ध्यान हरि म्हं लावै
तर्ज-एक डाल पर तोता बोले एक डाल पर मैना
