भारत की संस्कृति के लिए... भाषा की उन्नति के लिए... साहित्य के प्रसार के लिए

राष्ट्र प्रेम / सुवास खनाल

Kavita Kosh से
यहाँ जाएँ: भ्रमण, खोज

मलाई जप्नु छैन
हरेकक्षण
सन्ध्या मन्त्रजस्तो
अन्धराष्ट्रवादको नारा
वा
कन्ठ गर्नु छैन
रुढ राष्ट्रिय गानको
हरेक शब्द र वर्णहरू
के यसपछि

अनागरिक
वा देशद्रोही ?
देखेर
पसिनाले गल्दै गर्दा माटोका डल्लाहरू
मलाई अत्यधिक सन्तोष हुन्छ
फैलिँदै गर्दा आकाश छोएर
माटोको सुगन्ध
म हर्षविभोर हुन्छु
म जान्दिन
राखेर
सिरानीमा राष्ट्रिय झन्डा
हरदिन राष्ट्रिय सपना सुनाउन
म सक्दिन
हरक्षण बदलिइरहेको
राष्ट्रवादको परिभाषा घोक्न
जब हेर्छु
आफ्नो भूगोलका मान्छेहरूको स्वप्नील
अनुहार
अङ्कुरण भइदिन्छ
प्रेमको बीज
जब सम्झिन्छु
पुर्खाहरूको
बलशाली इतिहास
कहीँदेखि भरिएर आउँछ
शक्तिको अनौठो स्वरुप

सक्दिन
बेसुरा बर्बराउँदै हिँड्न
देशको नाम
र मलाई
टाँसेर
केही गर्नु छैन
आफ्नो टोपीमा
यो देशको नक्सा
तर
मलाई यो देश
प्राणजत्तिकै प्रिय छ ।