भारत की संस्कृति के लिए... भाषा की उन्नति के लिए... साहित्य के प्रसार के लिए
रिमझिम बरसे बदरा / पीसी लाल यादव
Kavita Kosh से
रिमझिम बरसे बदरा, अरे करिया-करिया।
नांगर धर निकलगे, खेत डहर नंगरिया॥
बादर गरजे बिजली लउके
चले जुड़ पुरवाही।
डारा-पाना झूमर-झूम के
देवत हवय गवाही॥
मगन मन अरऽऽ तता, मारत हरिया।
नांगर धर निकलगे, खेत डहर नंगरिया॥
मेचका-टेटका कूद-कूद के
नाचत-गावत हवय।
बंभरी रुख म लुकाय झिंगुरा
चिकारा बजावत हवय॥
जांगर-बाँहा के बल म, टोरत परिया।
नांगर धर निकलगे, खेत डहर नंगरिया॥
माटी म मिले माटी काया
तर-तर चुहे पछीना।
हरियर-हरियर धरती के तन म
चमके बनके नगीना॥
बइला के घाँटी संग में, झोरत ददरिया।
नांगर धर निकलगे, खेत डहर नंगरिया॥
