रूंख रो रंग / मधु आचार्य 'आशावादी'

कदैई देखो तो सरी
रूंख रो
ऊजळो रूप
सूरज री किरणां मांय
उण मांय दीसै
मैनत करणियै मजूर रो रंग
टपकतो पसीनो
थां कदैई देख्यो ?
बिरखा मांय
रूंख रा खुल जावै
पाना-पाना
अर उण मांय झांको
तो निजर आवै
टाबरी हंसी, मुळकणो।
आंधी मांय दीसै
बो गबरीलो जवान
ऊभो हुवै जिको
दुसमी साम्ही छाती ताण।
थांरे इण रूंख नै
कदैई देखो तो सरी
नित नूंवा रंग लियां
दीसैला जीवण रो नूंवो ढंग।