भारत की संस्कृति के लिए... भाषा की उन्नति के लिए... साहित्य के प्रसार के लिए
रूंख / शिवराज भारतीय
Kavita Kosh से
हरया-भरया मतवाळा रूंख
मनभावणियां प्यारा रूंख।
सगळां रै मनड़ै नै भावै
टाबर ऊछळ-कूद मचावै
फळ-मेवां रो बुगचो रूंख
मनभावणियां प्यारा रूंख।
उमड़-घुमड़ नै बादळ आवै
बिरखा नै ऐ तुरंत बुलावै
पंछी रो हेताळू रूंख।
सावण में ऐ जबरा झूमै
मचळ-मचळ आभै नै चूमै
हरखै अर हरखावै रूंख
मनभावणियां प्यारा रूंख।
बाग-बनां अर खेती बाड़ी
गांव-गळी री सोभा रूंख
म्हां सगळां रा जीवण साथी
मनभावणियां प्यारा रूंख।
