भारत की संस्कृति के लिए... भाषा की उन्नति के लिए... साहित्य के प्रसार के लिए
वसन्त के बारात - 2 / ऋतु रूप / चन्द्रप्रकाश जगप्रिय
Kavita Kosh से
वसन्त दुल्हा बनी केॅ की ऐलै
आम्र मंजरी के मड़वा गमगमाय उठलै
आरो हुन्नें
द्वार छेकाय के सुर जे साधलकै कोयलें
तेॅ सीधे झूमर तक पहुँचिये केॅ नै रुकलै
आबेॅ कोयल के साथें
पिपही की बजैतियै भौरा
लाजोॅ सेॅ पोखरी पर जाय बैठलै,
कमलोॅ के पंखुड़ी पर बैठी केॅ
दिन भरी पिपही बजैतेॅ रहलै।
पपीहा तेॅ फूले नै समावै
पिया केकरो ऐलोॅ रहेॅ
पुकार तेॅ ओकरे छेलै।
आबेॅ हारिल की करतै
गोड़ोॅ के लकड़ी छोड़ी डोली लगैतै द्वार
मैना तेॅ चौक पूरै मेॅ ही बेहाल छै
वसन्त दुल्हा बनी की ऐलोॅ छै
सौंसे धरती निहाल छै।
