वेई, न वरी / हरूमल सदारंगाणी ‘ख़ादिम’
मे जून जी देहलीअ जी गर्मी
उस लुक जी तपत
दोज़ख़ की हवा...
हिक खुश्क ज़मीन
उन ते आंधियूं
चौधार बदन ते आरायूं
तिर-तिर ते पघर
हॾ-हॾ में सूर
थी निड बि नेणनि मां काफू़र...
इअं तंग अची
सोचे
आखि़र
कश्मीर जे लइ तयार थियुसि।
हिअं
संभिरियलु सैर जे लाइ ॾिसी
मूंखे भेण चयो
ताकीद कयो:
कश्मीर वञिजि
सिमले बि वञिजि
या सैर कसौलीअ जो पुण कजि
पर
चाहीं, सलामत घर मोटीं
भुलिजी बि मसूरीअ कीन वञिजि।
मां
साणु करे पंहिंजी साथिणि
मूं सां गॾु ॼावल ऐं निपनियल
कश्मीर वियुसि
सिमले बि वियुसि
ऐं
भेण खे हिक वहमिण समझी
आखि़र में मसूरी पुण पहुतुसि
उति
खूब पहाड़ी सैर कयमि
खाधुमि
पीतुमि
ऐश कयमि
के ॾेख ॾिठमि
के ढंग ॾिठमि
पर
आखि़र में
मां ठॻिजी वियुसि
मां फुरिजी वियुसि
मां लुटिजी वियुसि।
हिक शाम
हमेशा जां घुमंदे
बाज़ार तरफ़ वेंदे वेंदे
रस्ते ते अजीब हजूम ॾिठुमि
कल नाहि त कंहिंजो इशारो थियो
अखि छिंभ में
होश
उॾामी वियो
बीठे बीठे
मुंहिंजे ॾिसंदे
गुम मिंट में थी वेई साथिणि।
मां ॾाढो रुलियुसि
बेहद भटकियुसि
ॾींहं रात
पुछाणा पंध कयमि
पर
वेई
वरी साथिणि न मिली।
मां कंहिंखे चवां?
फ़रियाद ॾियां!
इन ग़म में आहियां सरगरदान
वापस त बराबर आयुसि
पर
किअं
भेण खे
मुंहुं मां ॾेखारियां!
ए यारो!
हाणे रहम करियो
को कुर्ब करियो
को हीलो करियो
कंहिं रीति मिलायो साथिणि सां
विरही खे पंहिंजे प्रीतम सां
पर सेघ करियो
वीरम न विझो
जे पार-पतो घुरिजेव संदसि
ही याद करियो
ही नोट करियो:
हू आहि तबीयत जी आशिक
हर हुस्न नज़ाकत ॾे माइल
ॾींहं रात
रहे व्याकुल व्याकुल
खोयल-खोयल
नालो थसि दिल।
