शिकारपुर जी शेरनी - गंगा देवी / हूँदराज दुखायल
तर्ज़: मुस्कराते जाते हैं, कुछ मुंहं से फ़रमाने के बाद
शइरु: गरजंदी गंजे टकर जे कै़द में काहे हली,
सभु सुखनि आसाइशुनि जा आसरा लाहे हली,
कांग्रेसी कार्य खे मर्दनि खां वधि ठाहे हली,
क़ाइदा सरकार जा बंधड़क हीअ डाहे हली,
सा सच्चे सन्मान वारी आहे नारी जेल में
सिंधु मां पहिरीं गंगादेवी पधारी जेल में
शइरु: तुंहिंजा हमवतनी दुनिया जे दूर देसनि में वसनि,
थियो कराची, बम्बई ऐं कलकत्तो जिन जो वतनु,
सुर्ख रू तिनि खे कयो तो फ़खुर था तोते वठनि,
तुंहिंजे नाले जे मथां ॿलहार से देवी वञनि,
तो कई हासिल हकीकी सोभ सारी जेल में।
शइरु: जंहिं में थियो तुंहिंजो जनमु, सो गर्भु पिण पवित्र उत्तम,
जंहिं निपायो तोखे नंढिड़े गोद, सो बरतर उत्तम,
वास जंहिंमें तुंहिंजो थियड़ो सो नंगरु ऐं घरु उत्तम,
तो बणायो सिंधुड़ी सारीअ खे अॼु बहतर उत्तम,
तो मथां आज़ादगीअ जे जान वारी जेल में,
सिंधु मां पहिरीं गंगादेवी पधारी जेल में।
शइरु: तुंहिंजे अॻुवानीअ अॻियां क़ौमी झंडो झुलंदो रहियो,
नौजवाननि जे रॻुनि में खून थी छुलंदो रहियो,
भटकंदो मूज़ी मनइनामो पुठियां रुलंदो रहियो,
मुंहुं मगर तुंहिंजो मुर्क सां ऐं खिल सां ॿहकंदो रहियो,
प्रीति पंहिंजे देस सां तो नेठि पारी जेल में,
सिंधु मां पहिरीं गंगादेवी पधारी जेल में।
शइरु: रश्क ते तुंहिंजे मिड़ी ईंदियूं सवें ॿियूं स्त्रियूं,
मुर्कंदियूं मैदान जंग में ॾिसु अचनि थियूं स्त्रियूं,
बम्बई, सिंधु खे बणाए अॼु छॾींदियूं स्त्रियूं,
खूने दिल खोले खुशीअ जी भेट ॾींदियूं स्त्रियूं,
थियो निमाणे खून जो दरियाह जारी जेल में,
सिंधु मां पहिरीं गंगादेवी पधारी जेल में।
