भारत की संस्कृति के लिए... भाषा की उन्नति के लिए... साहित्य के प्रसार के लिए
शिव जी हीरो बनोॅ हो-63 / अच्युतानन्द चौधरी 'लाल'
Kavita Kosh से
गारी
हम्में तोरा सें समधी विनय करैछी
हम्में भइया लेॅ तोरोॅ बहिन मांगैछी
भइया छै हमरोॅ बड़ी गोरोॅ लारोॅ
तोरोॅ बहिनिया के नाम सुनैछी
छोटका मामू हमरोॅ बारोॅ कुमारोॅ
मामू लेॅ छोटकी बहिन मांगैछी
रसिया मामू के छै गज भर के छतिया
समधिन के तेन्हे सुनाम सुनैछी
सुनलॅ छी समधिन छै बड़ी रे गितारिन
गाना सुनैलेॅ बेहाल रहै छी
फुफू तोरोॅ समधी बड़ी रे नचनियां
देखैलेॅ फुफू के नाच चाहै छी
बन्ना
ढोल बाजेॅ दुअरा धमरु आबेॅ ऐंगना
धाबोॅ बन्ना आबोॅ बन्ना आबोॅ हमरोॅ ऐंगना
बाबा के पियारोॅ आबोॅ आबोॅ हमरोॅ ऐंगना
अम्मां के दुलारोॅ
बन्ना तोरोॅ मोरिया में हीरा आरी पन्ना
बन्नी के जी हाथोॅ में जड़ाबदार कंगना
बन्ना तोरोॅ आंखी में लागलोॅ छौं सुरमा
बन्नी के दांतोॅ में मिस्सी केसोॅ में फुदना
बन्ना गोरोॅ गाल तोरोॅ रसदार नयना
गोरी गोरी बन्नी चमकै छै जेना अइना
