शिव जोगी बनी ऐता हे / बाजित लाल मिश्र
शिव जोगी बनी ऐता हे, ई नै जानलाँ
भोला जोगी बनी ऐता हे, ई नै जानलाँ
हर जोगी बनी ऐता हे, ई नै जानलाँ
शिव जी के बीहा सुनी आनन्द उछाह हे
ब्रह्मा-विष्णु-इन्द्रदेव चललन बरात हे । ई नै....
माथां जटाजूट बान्ही भोला नाग लपेटलन हे
हाथोॅ में त्रिरशूल धरी, डमरू बजावै हे । ई नै....
माँग-धतूरा खाये भोला भेलन तैयार हे
भसम रमाये शिव बसहाँ सवार हे । ई नै....
भूत-प्रेत अंग-भंग लेलन सब संग हे
गण-सह रंग करत चललन बरात हे । ई नै....
नगरिक लोग दौड़ी-दौड़ी देखै जाय हे
बर-बरियात देखी डरहौ पराय हे । ई नै....
परीछेॅ चलली मैना आनन्द अपार हे
बौराहा बर देखी धुनये कपार हे । ई नै....
नारदोॅ के बात सभे फूस-झूठ भेलै हे
गऊरां सम्बोधै मैना बहुते बुझाय हे
विधि के लिखलेॅ माता टारलो नी जाय छै । ई नै....
धीर धरेॅ करेॅ माता बीद-बेहवार हे
त्रिभूवन नाथ भोला करता बेड़ा पार हे । ई नै....
बाजित भनये गौरा तप फल पैलन हे
शिव संगें ब्याही गौरा जगत-तारिणी हे । ई नै....
