शिशिर है की करै?
चाँदै नै, दीये रङ सुरजो बरै
शिशिर है की करै?
पानीं ठहारोॅ के पारो नै पाबै
कन्नें नुकैलै? नै मछली दिखाबै
रेहू नै, मिरका नै, गैंची-गरै
शिशिर है की करै?
मुड़लोॅ धनखेती में पाला के रूई
देहोॅ में गत्थी जाय शितलहरो सूई
खोरनी नै, बोरसी केॅ हात्हैं हुरै
शिशिर है की करै?
केसर-कस्तूरी नै, रूई नै पिया
ई ऋतु ओकरा लेॅ बेरथ, धुर-छिया
आरो यें जम्मे रङ ओकरा धरै
शिशिर है की करै?
गौन्हैं के कम्बल में हम्में असकल्ली
कैहिनें नी जैवोॅ ठहारी सें गलली
सब तेॅ दुसल्हौ में थरथर मरै
शिशिर है की करै?
-7.1.97