सजन टुक नाज़ सूँ मुझ पास आ आहिस्ता आहिस्ता
छुपी बातें अपस दिल की सुना आहिस्ता आहिस्ता
ग़रज़ गोयाँ की बाताँ कूँ न ला ख़ातिर मनीं हरगिज़
सजन इस बात कूँ ख़ातिर में ला आहिस्ता आहिस्ता
हर इक की बात सुनने पर तवज्जो मत कर ऐ ज़ालिम
रक़ीबाँ इस सीं होवेंगे जुदा आहिस्ता आहिस्ता
मुबादा मोहतसिब बद-मस्त सुन कर तान में आवे
तम्बूरा आह का ऐ दिल बजा आहिस्ता आहिस्ता
‘वली’ हरगिज़ अपस के दिल कूँ सीने में न रख ग़मगीं
कि बर लावेगा मतलब कूँ ख़ुदा आहिस्ता आहिस्ता