साल तिहत्तर / रणवीर सिंह दहिया
देश आजाद हुया था सैंतालीस मैं साल तिहत्तर बीत गये।
उनके बांटै दूध मलाई म्हारे करमां मैं बता सीत गये॥
1.
धनवानां के बिल्ली कुत्ते म्हारे तै बढ़िया जीवन गुजारैं वे
बिना भोजन कुपोषण होग्या म्हारै खाखा घणे डकारैं वे
हमनै कैह कै नीच पुकारैं वे घणी माड़ी चला रीत गये॥
उनके बांटै दूध मलाई म्हारे करमां मैं बता सीत गये॥
2.
जमीन आसमान का अन्तर यो किसनै म्हारे बीच बणाया
खेत कमावां सारी उमर फेर बी सांस नहीं उलगा आया
सोच-सोच कै सिर चकराया वे क्यूकर पाला जीतगये॥
उनके बांटै दूध मलाई म्हारे करमां मैं बता सीत गये॥
3.
तरक्की करी हरियाणे मैं अपणा खून पसीना बाहकै हे
उपर ले तो फायदा ठागे हम बाट देखते मुंह बाकै हे
देखे चारों कान्ही धक्के खाकै हे मिल असली मीत गये॥
उनके बांटै दूध मलाई म्हारे करमां मैं बता सीत गये॥
4.
जो तानाशाह हिंदुस्तान के उनतै आज सवाल म्हारा हे
गरीब क्यों घणा गरीब होग्या अमीर का भरग्या भंडारा हे
असली लाल किसान प्यारा हे रणबीर बणा ये गीत गये॥
उनके बांटै दूध मलाई म्हारे करमां मैं बता सीत गये॥
