सुन सखिया हे, कहवाँ ही सिरिजे़ले सुन्नर हथिया / भोजपुरी
सुन सखिया हे, कहवाँ ही सिरिजे़ले सुन्नर हथिया, कहवाँ ही सिरिजे मजोर हे,
कहवाँ ही सिरजे ननदी के भइया, जहाँ बसे प्रान हमार हे।।१।।
सुन सखिया हे, बनवा ही सिरजेले सुन्नर हथिया, बनवाँ ही सिरजे मजोर हे,
माई कोखी सिरजेले ननदी के भइयवाव, जहाँ बसे प्रान हमार हे।।२।।
सुन सखिया हे, केहरी से अइले सुन्नर हथिया, केहरी से अइले मजोर हे,
केहरी से आवेले ननदी के भइया, जहाँ बसे प्रान हमार हे।।३।।
सुन सखिया हे, पूरुबे से अइले सुन्नर हथिया, दखिन से अइले मजोर हे,
पछिम से अइले ननदी के भइअवा, जहाँ बसे प्रान हमार रे।।४।।
सुन सखिया हे, कहँवें, बइठइबो में सुन्नर हथिया, कहँवें बइठइबो मजोर हे
कहँवें बइठबो में ननदी के भइअवा, जहाँ बसे प्रान हमार हे।।५।।
सुन सखिया हे, दुअरे बइठइबों में सुन्नर हथिया, घरीए बइठइबों मजारे हे
मड़वे बइठइबो में ननदी के भइअवा, जहाँ बसे प्रान हमार हे।।६।।
सुन सखिया हे, केथिए खिअइबों में सुन्नर हथिया, केथिए खिअइबों मजोर हे
केथिए खिअइबों में ननदी के भइयवा, जहाँ बसे प्रान हमार हे।।७।।
सुन सखिया हे, डरवे खिअइबों में सुन्नर हथिया, खोअबे खिअइबों मजोर हे
दाल-भात खिअइबों में सुन्नर हथिया, खोअबे खिअइबों मजोर हे
दाल-भात खिअइबों में ननदी के भइयवा, जहाँ बसे प्रान हमारे हे।।८।।
सुन सखिया हे, केथिए समोधबों में सुन्नर हथिया, केथिए समधबों मजोर हे
केथिए समधबों में ननदी के भइयवा, जहाँ बसे प्रान हमार हे।।९।।
सुन सखिया हे, टकले समोधबों में सुन्नर हथिया, टकले समोधबों मजोर हे
टकलो समोधबों में ननदी के भइअवा, जहाँ बसे प्रान हमार हे।।१0।।
