सुवाल जी ॻोल्हा में लॻल / विम्मी सदारंगाणी
रात राणी आहे छोकिरी
ॾींहं जो ख़ामोश
रात जो चंचल ऐं मस्तु।
सिजु आहे छोकिरी
पंहिंजी बाहि में पाण सड़न्दी
शाम जो बुडी वेन्दी।
सुपनो आहे छोकिरी
जेको चादर ते लेटी
कूड़ पचाए निंड थो करे।
काग़ज़ जी ॿेड़ी आहे छोकिरी
तरन्दी हलन्दी थी वञे
कंहिंजो हथु लॻन्दे
इहा परवाह कए बिना।
हवा आहे छोकिरी
सन्दसि खिल पीछो करे रही आहे
सोनहिरी काग़ज़ जे फाटल टुकरनि जो।
हिकु ॿेटु आहे छोकिरी
सन्दसि रड़ियूं वाका सभु गुम थी वञनि था
चौधारी वकोड़ियल लहरुनि जे शोर में।
वणु आहे छोकिरी
सन्दसि बदन तां नितु नयूं ॿाहूं
ऐं ॿांहुंनि में हथ फटन्दा रहनि था
ॿिनि ॿांहुंनि जे हथनि सां हूअ
सभु कम नथी करे सघे।
ब्राईडल कीपर गुलु आहे छोकिरी
साल में सिर्फ़ पंद्रहं ॾींहं टिड़न्दी आहे
बाक़ी जा टे सौ पंजाह ॾींहं
उन जी सज़ा भोॻीन्दी आहे।
छोकिरी हिकु सचु आहे
जंहिं खे कूड़ खां डपु आहे
कूडु़ छाती खोले अचे थो
सच जे सीने ते दाग़ हणी हलियो थो वञ।
छोकिरी आहे हिकु जवाबु
सुवाल जी ॻोल्हा में लॻल!
