भारत की संस्कृति के लिए... भाषा की उन्नति के लिए... साहित्य के प्रसार के लिए
हमरऽ हथेली पेॅ / कुंदन अमिताभ
Kavita Kosh से
हमरऽ हथेली पेॅ ऐलऽ छै
आपनऽ माय सें बिछड़ी केॅ
खोता सें गिरी केॅ
एगो बगरो
आरो ओकरऽ जीवन केरऽ
अनन्त आकाश
जेना-जेना हम्में हाथ डोलाय छियै
उड़ै के हिसकऽ नै
पर पैखना फड़फड़ाबै छै
हमरा लगलै
जब तालुक बगरो
उड़ेॅ नै लागतै
अनन्त आकाश केरऽ
ओकरा लेली की अर्थ
फेरू सें ओकरा हम्मे
खोता में छोड़ी ऐलियै
आपनऽमाय सें जाय केॅ
वू सट्टी गेलै गुड़मुड़ियाय केॅ
आरो हमरा लागलै
सब दिना लेली बसी गेलऽ छै
हमरऽ हथेली पेॅ
बगरो केरऽ सौंसे परिवार
आरो ओकरऽ जीवन केरऽ
अनन्त आकाश।
