हमरा कहलो नै जाय छै / रामधारी सिंह 'काव्यतीर्थ'
1.
कि कहियौं भाय हमरा कहलौ नै जाय छौं
बिना कहनें हमरा रहलो नै जाय छौं
नै कहवौं तेॅ हमरा पचवो नै करथौं
नै पचथौं तेॅ अनकस्सर होय जैथौं।
2.
अनकस्सर होला पर परेशानी बढ़ी जैथौं
हमरा गामोॅ में एको गो ‘झोला छाप’ नै मिलथौं
रात के समय में कोय साथो नै जयथौं
समैया छौं खराब कन्हौ सड़को नै मिलथौं।
3.
चोर-बटमार मिलथौं तेॅ छीनी-छोरी लेथौं
हल्लौ करला पर कोय नै दौड़थौं
थाना जों जैभौ तेॅ डाँट-फटकार देथौं
नै कुछु देभौ तेॅ केसो नै लेथौं।
4.
शिक्षा के हाल तेॅ आरो बेहाल छौं
इस्कूल तेॅ छौं मतरकि भवने नै छौं
कुच्छू बच्चा-बुतरू तेॅ इस्कूल आवै छौं
मतर कामचोर मास्टर साहबे गायब छौं।
5.
कोय-कोय रोज आवै छौं मार-पीट करै छौं
जोहो बच्चा आवै छौं, सोहो भागी जाय छौं
कभी-कभार कहोॅ तेॅ शिक्षक गोस्साय छौं
-की करभोॅ तोंय, हमरा पर इन्सपेक्टरे सहाय छौं।
6.
हुनका जे दू सौ रूपया महीना दै छियै
यही वास्तें-जहिया मोॅ न होथौं तेॅ ऐभौं
हमरा बिलोॅ में कोय कटौती नै करिहौ
नै इस्कूल में आवी केॅ कागज-पत्तर देखिहौ।
7.
कोय जों कम्प्लेन करौं, तेॅ अनसुनी करिहौ
उलटे दू-चार बात करी केॅ हुनका भगाय दिहौ
कहलिहौं नी-हमरोॅ गाँव छै बड़ी इंटीरियर में
कथि लेॅ अइतै कोय हाकिम गामोॅ में।
8.
बितलोॅ पंचायत-चुनाव में
एकटा वार्ड मेम्बर चुनलिहौं
चार बरस बीती गेल्हौं
कोय तरह सें एकटा योजना मिलल्हौं।
9.
मुखिया कहै छौं-तीस परसेन्ट
इंजीनियर तेॅ रुसल्हौं
पेटी कन्टैक्टर अलगे कानै छौं
पंचायत सेवक तेॅ फसल्हौं।
10.
अइलौं इन्क्वायरी तेॅ
खोली देलक्हौं पेटारी
के देखत्हौं कामोॅ रोॅ गुणवत्ता
वहाँ तेॅ हुएॅ लागल्हौं खातिरदारी।
11.
गामोॅ सें दूरोॅ में उपस्वास्थ्य-केन्द्र छौं
मोॅर नै मकान छौं, दवा नै दारू छौं
डाक्टर नै कम्पाउन्डर, नर्सोॅ के नै ठिकान छौं
खाली पल्स पोलियो के दू बून्द पिलान छौं।
12.
किसान अलगे कानै छौं
मरम्मत बांध नै डाँरोॅ के
इन्द्र के भरोसा पर
हुनकासिनी के प्राण छौं।
13.
वर्षा होय गेल्हौं तेॅ खेती भेल्हौं
नै तेॅ गरीब सिनी दिल्ली, पंजाब गेल्हौं
छोटका-मोटका किसान सिनी कर्जा सें तोॅर भेल्हौं
महाजन सिनी तेॅ खूबे मालामाल होल्हौं।
14.
देश आजाद होला सें पचास बरस बीती गेलै
तय्यो हमरोॅ गाँव आजदी सें दूरे रहलै
केकरा कहवै, के सुनतै, सोचै में नै आवै छै
भाग्य आरो भगवान्हौं है गामोॅ पर आँख मूँदलेॅ छै।
