भारत की संस्कृति के लिए... भाषा की उन्नति के लिए... साहित्य के प्रसार के लिए
हमरोॅ देशः गुजरलोॅ वेश, खण्ड-03 / मथुरा नाथ सिंह ‘रानीपुरी’
Kavita Kosh से
जात-पात, उच्चोॅ-नीचोॅ के
आझो माथ्हैं सेहरा रे
आँखी के चश्मा सेॅं देखोॅ
अलगे सबके चेहरा रे ।।17।।
कुर्सी लोभें ई संन्यासी
किरिया रोजे धरावै छै
मालिक घोटै रोज खजाना
झूट्ठे मुँह बिदारै छै ।।18।।
तिलक-छाप दुर्गा-काली के
भितरे जाल् बिछावै छै
परजीवी के धंधा देखोॅ
चुसिये मौज मनावै छै ।।19।।
मुरदा पर छै छीना-झपटी
कुट्टी-कुट्टी बाँटै छै
मांसे ढेरी भोग लगावै
दोसरा केॅ ई डाँटै छै ।।20।।
धन्य भाग ई लूट तंत्र
साल्है गाँठ मनावै छै
हड्डी के ढेरी पर बैठी
सबके ई ललचावै छै ।।21।।
गीतो मंगल गाला-गाली
तू-तू मै के गावै छै
एक दोसरें करै उघारोॅ
अपन्हैं मौज मनावै छै ।।22।।
जादू-मंतर फूँक मारिये
सबके भेंड बनावै छै
झाड़ी-फूकी भूत भगावै
प्रजातंत्र कहलावै छै ।।23।।
रानी कुर्सी रूप सँवारै
केकरा नै ललचावै छै
स्वर्ण सुन्दरी खातिर के नै
आपनोॅ शीश झुकावै छै ।।24।।
