हम फोन करैं जब तेरे पै म्हारा / करतार सिंह कैत
हम फोन करैं जब तेरे पै म्हारा सुणकै फोन तू आ जाइये
म्हारा भीम मिशन म्हं हित होगा एक गीत मिशन का गा जाइये
एक दिन गीत सुण्या था तेरा मेरै उस दिन पाछै ज्ञान हुया।
साठ साल खो दिए खामखां कुणबा बहोत बिरान हुया।
ना पूरा लाभ कोटे का म्हारा बहोत घणा नुकसान हुया।
बिना अकल उभाणे ऊंट फिरैं थे ईब भीम मिशन तै ज्ञान हुया
दीपक म्हं बाती सूखी सै, आ तेल मिशन का पा जाइये
म्हारा भीम मिशन...।
मान्य जोतिबा राव फुले तनै कर्या जिकर सावित्री बाई का
जिनै शिक्षित कर्या समाज हमारा इसा करगे काम भलाई का
घर बार छोड़कै बाहर लिकड़गे ना मान्या हुकम उन्हाई का
कॉलेज और स्कूल खोल कर्या धंधा शुरू पढ़ाई का
जो तनै बताए वो याद म्हारै बेशक सुण अजमां जाइये
म्हारा भीम मिशन...।
रैदास, कबीरा, सैन भगत म्हारे हो लिए संत भतेरे रै
जोरा, दादू, पीपा, साही इन्हनै सारे पाछै गेरे रै
उस झलकारी बाई का जिकरा होणा था चारो फेरे रै
पाठ्यक्रमों तै पाठ हटाकै करे दिन म्हं घोर अंधेरे रै
ईब अंधेरे को मेटण खातर एक मिशन का दीप जगा जाइये
म्हारा भीम मिशन...।
हम कुमा कुमा कै बोदे होा लिये म्हारी बोझ तलै टूटी पांसू
म्हारे शोषण नै देख देख ईब पत्थरों कै आए आंसू
ईब भीम मिशन म्हं जीणा मरणा काम भीम की मैं खा सूं
गुरु भजन सिंह ना मिलै मनैं जैं टोहवण खातर मैं जा सूं
करतार सिंह काकौत वाले कुछ ओकै राह दिखा जाइये
म्हारा भीम मिशन...।
