हाइकू / सुशीला श्योराण
(१)
नाच्यो हिवड़ो
देख’र काळी घटा
बोल्यो- मोरियो !
(२)
टाबर भाज्या
पकड़स्यां धनक
म्हारै मामै री !
(३)
गांव रै कुवै
चौपाळ लुगायां री
दुखड़ो रोवैं !
(४)
छोटी उमर
परणाई बाबो-सा
रोवै थारी धी ।
(५)
क्यूं परणाई
रोवै है चिड़कली
बैठ बिदेस !
(६)
बरस्यो मेह
हाथ हळ्सोतियो
जी मैं हुळास !
(७)
सीळी पिरवा
जळावै म्हारो जीव
वै परदेस ।
(८)
तपै तावड़ो
चिड़ी उडीकै मेह ?
रेत न्हावै !
(९)
चढ चौबारै
गोरी निरखै चांद
रोवै हिवड़ो !
(१०)
रूत सावण
बागां पड़्या हिंडोला
आवो साजन।
(११)
मीठी लापसी
मा सा रा गुलगुला
देस बुलावै !
(१२)
सूरज गिंडी
जा लुकै समंदर
दिखै दिनूगै !
(१३)
कैर-खेजड़ी
अठै दुखां जूझणो
सिखावै थानै ।
(१४)
सुरंगी रूत
धोरां रेसम-तीज
सावण गीत!
(१५)
टाबर-टोळी
न्हावै नंग-धड़ंग
हरखै जीव !
(१६)
ओ गठजोड़,
एक गांठ सूं काट्या -
जलम-नाता !
(१७)
थारो ई अंस
कदै जलम्यां मारी
कदै कूख में !
