हिक घोमूं दड़े जी खोज / गोवर्धन शर्मा 'घायल'
‘मूअनि जो दड़ो’ जा खोजनीको!
अदबी इतिहास जे कोरनि काग़ज़नि में
ईन्दड़ पीढ़ियूं
मूंखे पढ़ी सघंदियूं
चालीहनि सालनि जो हिकु पुराणो दड़ो
पेश खि़ज़मत आहे,
इंच इंच जे डिस्टंस खां बि
घटि दूरीअ ते
हिकु नओं दड़ो
दड़ा ई दड़ा!
दर वटि
इंडियन एयरलाईन्स जा
ॿ पहरेदार ऐं
उन्हनि जे पासे में बीहारियल
जेमिनी पिक्चर्स जा पंहिंजी
चमिड़ीअ सां ई मुकमल तौर ढकियल
माडर्न आर्ट जा ॿ नमूना
खोड़ियल आहिनि
दड़े जे पोलार जूं दीवारूं
ॾिखियल चिटियल आहिनि।
रमीअ जे पतनि सां
चोरासी आसणनि सां
ब्लो हॉट ब्लो कोल्ड ऐं जय संतोषी मा जे
हॉट सीन्स सां
बिल्ट़्ज जे लास्ट कवर पेज जे
मथियें साॼे कार्नरस् सां
दड़े में
वक़्त जी दज़ सां अलॻ अलॻ कयल
हिक-ॿिए मथां बीहारियल
टे ताजमहल आहिनि
(चोथों अंडर कंस्ट्रक्शन आहे)
ॿ क़बरूं जेसल तोरल जूं आहिनि
हिक भिटिकन्दड़ रूह जो पिञिरो
(हिक कुंड में पियो आहे)
पिञिरे जी बनावत: मुंहुं मेहार जो
पेर ससुईअ जा, ॿाहूं फ़रहाद जूं
जंघूं रोमियो जूं
बाक़ी के टुकर गंढियल त के छिनल
लीलां चनेसर जा
लैला मजनूअ जा
कटु लॻल पिञिरे चिमकन्दड़ अखियुनि सां
कोइल ॾीपचन्द जो क़िस्सो वही रहियो आहे
हिक गुब्बारे में पियल
अण-छुहियल, उॾही खाधल
देसी विदेशी ॿोलियुनि में
ख़त, दस्तख़त, मख़ज़नूं, रिसाला
किताब, ग्रन्थ, तस्वीरूं
(छपियल ऐं अध-छपियल बि)
काम शास्त्रा खां भाषा शास्त्र ताईं
ओॿासियूं ॾेई रहिया आहिनि
हिन दड़े में
Sovereign, Bagpiper ऐं Doctor जूं
ओॻरायूं पखिड़ियल आहिनि
रान में हिक ई वक़्ति कयल
ॿटीह हमला मिलनि था
हिक हिस्से में गंगाजल, ॻाए खीर ऐं
मौसमीअ जे रस जा चश्मा आहिनि
भरिसां ई
ॿरन्दड़ ग्रीन सिगनल ते पढ़िजे थो Welcome
Central Bank जो Monogram
नारेल, अम्ब जूं काठियूं, केले जा पन
काफ़ूर जी टिकी
खीरु, डुघु, गीहु, मखणु, माखी
तुलसीअ जे ॾलनि जो mixture
सतनारायणु झूटा खाई रहियो आहे
कथा बूसाटिजे पेई,
TV ते ‘शराफ़त छोड़ दी मैंने’
ॼमी वियो आहे
बुश बोनानज़ा ते आरतवारु वेठलु आहे
बूसाटियल घोमूं दड़े जा
सभु कपाट खुलियल आहिनि।
