भारत की संस्कृति के लिए... भाषा की उन्नति के लिए... साहित्य के प्रसार के लिए
हिम्मति ना हार्यो सजनवा / बोली बानी / जगदीश पीयूष
Kavita Kosh से
हिम्मति ना हार्यो सजनवा
कि धीरे धीरे दुनिया बदलि देबै नाय
मिटिहैं जुलुम के निसनवा
कि धीरे धीरे दुनिया बदलि देबै नाय
भूखेन का रोटी पियासेन का पानी
सुधुवन पर जब कउनौ लाठी न तानी
सुधरी कचेहरी और थनवा
कि धीरे धीरे दुनिया बदलि देबै नाय
लातन ना गउंजी जब हउसन का कोई
दौलति के आगे जब मेहनति ना रोई
जगर मगर होइहै ंसपनवा
कि धीरे धीरे दुनिया बदलि देबै नाय
आवौ तौ ई अंधरी खांइन का पाटी
रस्सिन का बेड़िन का मुस्कन का काटी
तागति ते भरि जइहै मनवा
कि धीरे धीरे दुनिया बदलि देबै नाय
