भारत की संस्कृति के लिए... भाषा की उन्नति के लिए... साहित्य के प्रसार के लिए
हेनोॅ डपटी केॅ नै महफिल सें निकालोॅ हमरा / अमरेन्द्र
Kavita Kosh से
हेनोॅ डपटी केॅ नै महफिल सें निकालोॅ हमरा
थोड़ोॅ बहकी गेलोॅ छी तोंही संभालोॅ हमरा
आपनोॅ ऐब तोहें सबटा पकड़ले राखियोॅ
चालनी सें जना चालै होनै चालोॅ हमरा
फूटथौं, हाथ झरकथौं तेॅ नै कहियोॅ कुच्छू
गेंद समझै छोॅ अगर तों तेॅ उछालोॅ हमरा
पानी बहलै जे-हुनकोॅ खेतोॅ में घर में गेलै
आरो हिस्सा में सिरिफ मिललोॅ छै बालोॅ हमरा
शालीग्रामे हेनोॅ पूजोॅ तोहें हमरा दिन में
रात में आलुवे रं तोहें उबालोॅ हमरा
सब तेॅ पीलेॅ छै मतैलोॅ छै लड़खड़ाबै छै
तोहें बोलै छोॅ ककरा है की... संभालोॅ हमरा
कल जों रहलौं केन्हौं जित्तोॅ तेॅ कहानी कहभौं
आय भरी जेना हुवौं होन्हैं केॅ टालोॅ हमरा
-1.8.86
