भारत की संस्कृति के लिए... भाषा की उन्नति के लिए... साहित्य के प्रसार के लिए
हेमन्तको सिरेठोमा / गीता त्रिपाठी
Kavita Kosh से
हेमन्तको सिरेठोमा मुटु कमाउँदै
परेलीका गह थुनी पानी जमाउँदै
भासिएर गहिराइमा जीवन पुग्न लाग्यो
क्षितिजपारि बादलमा जीवन डुब्न लाग्यो
ओठभरि थकाइको सुस्केराले छाई
बोझ लाग्यो आफ्नो जीवन आज आफैँलाई
दोसाँधमा अल्झिएर जीवन बित्न लाग्यो
क्षितिजपारि बादलमा जीवन डुब्न लाग्यो
वसन्तको बहारभित्र नदेखिने बह
फुट्न खोज्छ छातीभित्र वेदनाको दह
जिन्दगीको अर्थ पनि उल्टो लाग्न थाल्यो
क्षितिजपारि बादलमा जीवन डुब्न लाग्यो
फूलजस्तो सोच्थेँ जीवन काँढा बन्यो आज
कसिङ्गर बन्नुपर्यो दुनियाँको माझ
विवशतामा पिल्सिएर जीवन सुक्न लाग्यो
क्षितिजपारि बादलमा जीवन डुब्न लाग्यो
•
