हरियाणवी लोकगीत ♦ रचनाकार: अज्ञात
हे राजा राणी चले बनबास बड़ तले ला लिया डेरा
हे राणी सो गई चुंदड़ी तान सरप ने दे लिया घेरा
हे री मैं पल्ला उघाड़ जरा देखूं अंखियां खोलदी कोन्यां
हे री मैं ने मुख से करी दो बात मुखड़े सै बोलदी कोन्या
हे री मैं ने पहुंचे से पकड्या हात नाड़ी तो उस की चालदी कोन्यां
हे री वो रोया बड़ के लाग मेरे तो मां बाप बी कोन्यां
हे री वो रोया नदियां बीच मेरे तो एक लाल बी कोन्यां
ए रे कटवा दूं चन्दन रूख अड़ै तो कोई रूख बी कोन्यां
ए रे चिणवा दूं चिता के बीच मेरे तो कोई गैल बी कोन्यां
ए रे मनै ढूंढी सारी बिलात इसा तो कोई फूल बी कोन्यां