भारत की संस्कृति के लिए... भाषा की उन्नति के लिए... साहित्य के प्रसार के लिए
है मरूभूमि छेकै केकरो की पता ऐतै / अमरेन्द्र
Kavita Kosh से
है मरूभूमि छेकै केकरो की पता ऐतै
कुछ जों ऐतै तेॅ उमसलोॅ होलोॅ हवा ऐतै
है के कहतै कि जानो जिस्म में ऐतै चल्लोॅ
जान गेल्है केरोॅ बादोॅ में जों दुआ ऐतै
आँख मुनलोॅ रहोॅ तोरा तेॅ पता नै चलतौं
जाबेॅ दौ केकरौ लेॅ आबै छै सौ बला, ऐतै
ई सुनी कतना खुश दिखै छै जमानावाला
फैसला होलोॅ छै ई हमरा लेॅ सजा ऐतै
एक खरगोश के चक्कर में सिंह पड़लोॅ छै
कैन्हें ओकताबै छोॅ आब्हैं तेॅ ऊ मजा ऐतै
आय तलक आँख रोॅ खुशिये ही गजल में ऐलै
कहिया गजलोॅ में दरद दिल के ई जमा ऐतै
की छै अमरेन के पासोॅ में गजल गीतोॅ के
ओकरो लुग कोय्यो कथी लेॅ कहोॅ भला ऐतै
-8.6.92
