भारत की संस्कृति के लिए... भाषा की उन्नति के लिए... साहित्य के प्रसार के लिए
ह्यांवत मा ना जुरिहै अबकी / बोली बानी / जगदीश पीयूष
Kavita Kosh से
ह्यांवत मा ना जुरिहै अबकी
पइरउ क्यार बिछउना
बिटिया के घर जनमु लिहिसि है
सूखा मा लरिकउना
पारसाल की बाढ़ ते अब लौं
उबरि न पायेन हम
कोठरी की भसकी देवाल का
जोरि न पायेन हम
फीस न भरि पायेन इहिते
घर बैठ रहा छोटकउना
लिखी बदी सब आय कहति हैं
कहे करे ना होय
ई दुरदिन मा देखि लीन हम
हितू न आपन कोय
सिर्फ लोनु रोटी है अब तौ
भूलि गवा मिठलउना
राहत का सरकारी पइसा
डकरि गये परधान
हम जइसेन के घर ना गोंहूँ
ना मूठी भर धान
दउरि रहा नेता लीन्हे अब
कागद क्यार घोड़उना
