भारत की संस्कृति के लिए... भाषा की उन्नति के लिए... साहित्य के प्रसार के लिए

ॾाहियूं डुख ॾिसनि / अर्जुन ‘शाद’

Kavita Kosh से
यहाँ जाएँ: भ्रमण, खोज

नज़ारो 1. कौंरूअ जे महल जो कमरो

चंड जहिड़ी मुंध आ बीठी जवाहरनि सां जड़ी
आहि लेकिन हसरतुनि जी धुंधकारीअ में खड़ी

को त अॼु हिन हूर जूं कुझु हस्ररतूं टोड़े अची
के घड़ियूं ई को त हुन जे भाॻ खे जोड़े अची

अॼु बहारीअ जो सॼीअ दुनिया ते आ छांयल ख़ुमारु
राजकन्या जे न दिल जे बाग़ में पुर आ बहार

कल्पना में ॾींदो दर्सन खेसि मन जो मीतु आ
अणॾिठे आशिक थियण जी हीअ अनोखी रीति आ

हार ऐं सींगार थिया हुनजा चनेसर बास्ते
थियो जीअणु हुनजो फ़कत हिक पहिंजे दिलबर वास्ते

ग़मज़दा कौंरूअ खे पहिंजे ई ख़यालनि में ॾिसी
हिक सहेली चोरी चोरीअ आई ऐं बीठी लिकी

ओचितो कौंरूअ जूं अखिड़ियूं साहेड़ीअ बू/टे छॾियूं
कोशिशूं हुन खां छॾाइण जूं कयूं कौंरूअ घणियूं

टहिकड़ा ॾींदियिूं सहेलियूं मौज में झूमण लॻियूं
ॼणुकि कौंरूअ वटि खणी आयूं बहारीअ खे सखियूं

अॼु हवा जे झोके झोके में भरियल आहे शराबु
अॼु जवानी मस्तु थींदी, अॼु उॾी वेंदो हिजाबु

रूह जे दरिया जो ज़र्रो ज़र्रो छोलीमार आ
पेर धरतीअ तां उॾामनि, रक्स जी रफ़्तार आ

(कौंरूअ जे चौधारी सहेलियुनि जो नाचु)

(नाचु पूरे थियण खां पोइ कौंरूअ जो आवाज़)

”ऐ सहेलियूं पंहिंजी कौंरू जी बि सुधि लहंदियूं वञो
दिल में केॾा दाग थी विया से बि कुझु ॾिसंदियूं वञो

ख़ाक थी बेंदी असांजी आरजू, नाहे ख़बर
या असांजी दांहँ जो भी थींदो दिलबर ते असर!“

माउ कौंरूअ जी परे खां हालु हीउ ॾिसंदी रही
पंहिंजी ॿचिड़ीअ खे ॾिसी दिल थी संदसि दुखंदी रही

आई जीजलि खे आथतु ॾियण जे वास्ते
हुन जे ज़ख़मनि जे मथां मरहम रखण जे वास्ते

भलि त सुहिणियूं देस जूं हाकिम चनेसर ते मरनि
पंहिंजी लीला सां मगर हुर्ठ अणमई हुन जी लगनि

हूकंदो कौरुंअ खे पंहिंजो ॻाल्हि हीअ मुश्किल हुई
पर इरादो माउ जो हो पाईणी मंज़िल हुई

फ़ैसलो थियो हू वञनि जल्दी चनेसर जे वतन
वेसु पंहिंजे खे मटाए वेसु वणिजारियुनि जो कनि

रम्ज़ सां राजा खे कौंरू पाण ते मोहे छॾे
कंहिं नमूने साणु मन पंहिंजी फिटल क़िसमत अॾे!

नज़ारो-2 चनेसर जे महल जो अङणु

आ सभाॻो जन्म दिन राजा चनेसर ॼाम जो
शान लासानी थो ॾिसिजे राॼधानी गाम जो

विया खुली शाही महल जा द्वार जनता वास्ते
शुभ इछाऊं हर को आणे पंहिंजे राजा वास्ते

ओचितो दरवाजे़ खां घिडंदियूं ॿ आयूं औरतूं
पोर्हियतूं पोशाक में पर रूप में राणियूं हुयूं

हिक हुई बदबख़्त कौरुं ॿी हुई उन जी अमड़ि
थी चुको हो आस जो गुलशन सब्जो जिनि लइ उजड़ि

भिटकंदियूं चारा ॾुखेरा तइ कंदियूं आयूं हुयूं
पर न राजा थे मिलियुनि, व्यर्थ वियनि सभु कोशिशूं

अॼु ख़ुशीअ जे ॾींहुं आयूं अर्जु राणीअ खे करण
आयूं मक़्सद वास्ते महलात में दासियूं थियण

चौतरपफ़ आवाज़ गूंजे थो त राणी थी अचे
शादमाना था मचनि हर को ख़ुशीअ में थो नचे

माउ कौरुंअ खे वठी बीठी अची राणीअ अमियां
अर्ज़ पंहिंजे खे रखियाईं दर्द जे अंदाज़ सां

आई ॾाढी कहल लीला खे हुननि जे हाल ते
कमु रखियाऊं पॻ उणणु जो तिनि मां हिकड़ीअ ज़ाल ते

ॿीअ ते कमु हुन राणीअ जी सेजा बिछाईण जो रखियो
खू़ब ख़ुश कौरुं थी, ॼणु ऊंदाह में सूरज बखियो

के घड़ियूं कौरुं फ़क़्त लीला खे ॾिसंदी ई रही
हुस्न में हिक तूं न आहीं पाण खे चबंदी रही

पीसिजी किस्मत जे बेन्दियूं चीचड़े में छा ख़बर
या मटाईंदियूं हली तक़दीर जो उल्टो चकर!

नज़ारो-3 चनेसर जे महल जो कमरो

नेण राजन पंहिंजा थे वर वर करे दर ॾे कया
दिल जे सिंघासन जी राणी मुरिकंदी आई इझा

आरती हथ में, मथे ते हो सुहाॻिणि खे सिंदूर
आई मालिक खां मङण हूअ सर्सु सिक वारो सरूर

आई हुई लीला वरेती वर खे वाधाई ॾियण
पंहिंजे प्रीतम सां मोहब्त जूं मिठयूं ॻाल्हियूं करण

पंहिंजी पट राणीअ जो राजा ख़ूब ई आदर कयो
ॿिनि दिलियुनि में प्रेम जो दरियाहु ॼणु उथिली पियो!

लीला ऐं चनेसर जो नृत्य

नज़ारो-4 चनेसर जे सुम्हण जो कमरो

नियम सां सेजा चनेसर जी विछाइण थी अचे
खू़ब दिल जा दास्तान कौरुं ॿुधाइण थी अचे

ॾींहं ॾींहंनि ते विया, रातियूं बि इअं मुज़री वयूं
कीन कौरुंअ जे मुक़दर जूं ठहियूं राहुं नयूं

सेज राजन जी ॾिसी, अरमान पंहिंजा थी ॾिसे
दिल जे दामन में चुभियल पीकां पंहिंजा थी ॾिसे

रोउ ऐ दिल रोउ तुंहिंजे वास्ते रुअणु रहियो
तुंहिंजे लाइ बस कमु फ़क़त ॻोढ़नि सां ॻिल धूअणु रहियो

सुधि न कौरुंअ खे रही थियो रात जो केॾो गुज़र
पंहिंजे ई पूरनि में दुनिया खां थी वेई बेख़बर

के घड़ियूं सुपननि संदे आग़ोश में लेटी रही
थे ॾिठाईं ॼणु चनेसर आयो हो हुन वटि कही

छिर्कु मारे जिअं मगर कौंरूअ हक़ीक़त खे ॾिइो
नीरु नेणनि में हुयसि हुन पंहिंजी फुरक़त खे ॾिइो

हू उथी कमरे जा ॾिया ऐं बतियूं त/ारण हली
ऐतिरे में नाज़ मां लीला उते निकती अची

हीअं ॾिसी कौंरूअ खे रुअंदो हूअ घणों हैरान थी
नेठि कौंरूअ खां पुंछियाईं, छाजे लइ अरमानु थी

कीन कौंरूअ दिलि जी हालत खे सघी लेकिनि सले
पंहिंजे रूअण जी हक़ीक़त खे सफा वेई अले

हुन चयो: राणी! अखियुनि खे तेल ॾीए जो लॻो
आहि ही उन जो नतीजो, कीन थे पर मूं रुनो

कीन पर लीला कयो कौंरूअ ते कुझ भी ऐतबार
लुड़िक लाड़णु जो सबबु हुन खां पुछियाईं वार वार

नेठि लीला खे सॼी कौंरूअ सुणाई वार्ता
हुन चयो: राणी! मूंखे पंहिंजो समो भी याद आ

राॼ कन्या मां हुयसि, मुंहिंजो बि छा तोमान हो
तो जियां राणी असांजो भी शहाणो शान हो

वक़्त ते लेकिन न आहे कंहिं खे कोई भरोसो
कंहिं खे सुधि हुई अॼु असांजो हाल थी वेंदो कसो

कीन थे हुन खे मगर वेसाह सां लीला ॾिठो
सारो किस्सो मन घड़त लीला खे कौंरूअ जो लॻो

ओचितो लीला जी अखि कौंरूअ जी गर्दनि ते पई
छा जो ही चिमकाटु हो हैरान थी लीला वई

हार जो चोलीअ जे हेठां, पर हुयुसि केॾो शुआउ
रुख़ ॾिसी लीला जो कौंरूअ भी लॻायो पंहिंजो दाउ

हार खे लाहे खणी लीला जे हुन वेझो कयो
हीअ निशानी आ अमूणे शान जी, कौंरूअ चयो

दिल जी हस्रत आहि हिकड़ी, जे इजाज़त ॾीं चवां
इल्तिजा मुंहिंजी मञीं तां हार ही भेटा रखां

हार जो चिमकाटु हो या विॼु वराका थे ॾिना
चैन लीला खे अचे किअं हार खे पाइण बिना

हुन चयो कौंरूअ खे हिन जी केतिरी क़ीमत ॾियां
पर चयो कौंरूअ न पैसे ते थी हीउ विकिणणु घुरां

आहि हिकिड़ो शर्तु ऐ राणी! कंदीअ जे तूं क़बूल
हारु थींदो दाइमा तुंहिंजो, न तूं रहन्दीअं मलूल

छा खपे क़ौंरू चई ॾे छा खपे तोखे भला
छा खपेई तोखे ॾींदसि, चउ खणी खोले सफ़ा

मूंखे ॾे मोकल त हिकिड़ी रात राजन सां रहां
उमिर भरि तूं पेई वञु मां रात हिकिड़ीअ लइ वञां

ही ॿुधी लीला जा सारा हौंसला थी विया ख़ता
दिल में धड़कण थी शुरू ऐं अंग सभु फ़ड़िकण लमा

कीन थी सघंदो इहो तुंहिंजो महांगो शर्तु आ
हारु भी घुरिजे मूंखे, ॿियो कहिड़ो तुंहिंजो शर्तु आ

नवलखो ही हारु तुंहिंजे आउं क़दिमन मतें रखां
मूंखे ॾे मोकल फ़कति हिक रात राजन सां रहां

थिड़िकंदो आयो चनेसरु देर सां कमरे अंदर
हो घणो पीतलु, नशे में चूरि हो अॼु सर बसर

ईंदे ई हिकदम चनेसरु सेज ते लेटी पयो
कांध खे ठाहे सुम्हारण जो जतन लीला कयो

तुरतु ई कौंरू लिकाए हार खे वेई हली
हूअ चनेसर जे छॾे दीदार खे वेई हली

घोट खे लीला ॾिनो पंखे सां झोंको हीर जो
आई हिक ॿान्ही ॾियण हुन खे कटोरो खीर जो

खीरु ठारींदी रही कुझु दिल में सोचींदी रही
हार जी हूअ कल्पना रंगीन खोलींदी रही

हिक नज़र राजन ते उछिलायाईं ऐं ॿी हार ते
हार सां गॾु पायां पंहिंजे कांध जे भी प्यार खे

ओचितो लीला जे मुंहं तां हटी बादल विया
कुझु सुझी आयुसि जो हुनजा नेण ॼणु चमिकी पिया

अॼु नशे जे हाल में आ, नाहि राणो होश में
खेसि कल पवन्दी न, कमु थींदो अंधारे पोश में

जे अॼोकी रात ॾींदियसि आंउ कौंरूअ खे खणी
कीन को नुक्सान थींदो, थींदी चतुराई घणी

रात राणे साणु काटण काणि कौंरूअ खे सॾे
हार खे लीला खणी, वेई चनेसर खे छॾे

अॼु त कौंरूअ जे नसीबन सां को भेटे पाण खे
ॼणु चकोरीअ आहि पातो चंड जी चांडाणि खे

सिक मंझा आई खणी कौंरू कटोरो खीर जो
हाइ पर राणो नशे में निन्ड जी तस्वीर हो

थिड़कंदड़ हथिड़नि सां हूअ राणे जे चरननि ॾे बधी
हुन वञी ॼणु हिति हींअर कारूं जी दुनिया लघी

हूअ ॾिसी राजन खे अॼु अरमान सभु कढंदी रही
पेर प्रीतम जा खणी ॻोढ़नि सां हूअ धूअंदी रही

जामंदी कौंरू रही सारो सुतल संसारु हो
शाद हुई कौंरू संदसि पासे में अॼु दिलदारु हो

सुबुह थी वेंदो कंदो हुन सां न दिलबरु बात छा
कीअं ॿुझे हीअ प्यास जंहिं में उमिर जी ओसाट आ

निन्ड मां जाॻियो चनेसर रात जे पोएं पहर
आई पेरांधीअ खां हुन खे अजनबी औरत नज़र

गुस्से ऐं हैरत मंझां हुन सेज पहिंजीअ खे छॾियो
केर तूं, लीलां किथे, हुन मुंध धारीअ खे सॾियो

नेण निविड़त सां भरे कौंरू अची बीठी अॻियां
एतिरे में माउ कौंरूअ जी बि आई थे पुठियां

हुन कयो प्रणाम राजन खे अची हथिड़ा ॿधी
हार जी आई सुणाइण माजिरा अॻिते बधी

राति राजन! तोखे लीला हार ते विकिणी छॾियो
मूं ते जे विश्वास नाहे भलि त राणीअ खे सॾियो

हिति रहण जी हुन ई कौंरूअ खे इजाज़त आ ॾिनी
तोतां ई सिर-साह खे सदिके कंदी हीअ सोहिणी

ही ॿुधी ॾाढी चनेसर खे अची गैरत वई
बेलछणि लीला जे लछणनि ते लॻी हैरत वई

हुकुम थियो लीला खे आणियो दूबदू मुंहिंजे अॻियां
परख़ थिए मुहिंजे अमियां, थिए गुफ़्तगू मुंुहिंजे अॻियां

जूम मां आई उते ॿान्ही का कमरे जे अंदर
हुन महाराजा खे ईंदे ई सुणाई हीअ ख़बर

अॼु महल में कोन लीला जो पवे थो को पतो
राह में हीरा पखेड़ियल खुद हली हाकिम! ॾिसो

ही ॿुधी सिर ते चनेसर जे किरी पियो ॼणु पहाड़
रूह में हुन जे मची वियो ॼणु ग़ज़ब जो रोॼु राड़

राइ! हुन मुंहिंजी वफ़ा सां छो कई हेॾी दग़ा
कांध खां वधि खेसि कूड़े कांच जा टुकिड़ा लॻा

रूह में राणे जे रंजिश केतिरी भारी हुई
जंगि जे मैदान जी ॼणु कशमकश जारी हुई

कीन कौंरू पंहिंजे प्रीतम जे ॾिसी दुख खे सघी
पंहिंजे साजन जे वञी चरनन में वेठी हूअ झुकी

पेट जाईअ जी ॾिसी क़िस्मत पई जीजल ठरी
हूअ करे प्रनाम राजन खे हींअर वापस वरी

राणे खे कौंरू जे कोमल भाव जो अहिसासु थियो
हुन अभाॻीअ जो बि आखि़र आहि सपुनो रास थियो

हुन पुछियो: ऐ मुंध, तोखे मूं वटां चउ छा खपे
मुंध ॿोल्यिो: तो वटां मूंखे मिलियो सभु कुझ अॻे

कल्पना में तोखे सांभरि खां ई मूं सांढे छॾियो
अॼु त पहिरियों ई दफ़ो साक्ष्यात् आ दिलबरु गॾियो

भलि करे हीअ सुबह तोखे मूंखां ऐ राजन जुदा
कल्पना में कीअं विछोड़े मूंखे को सघंदो भला

खुद ई कौंरूअ खे उथारियो राज-राणे प्यार मां
हुन वञी सेजा ते कौंरूअ खे विहारियो पाण सां

हुन झुकी, प्रीतम जे पेरनि जी खंई प्यार पणी,
थी पवित्र पेई तंहिंखे पंहिंजे मस्तक ते हणी

रात थी पूरी वई, कौंरू वचन पालण उथी
ॼणु छॾे सपुनो, वरी साभ्या में सा जालण उथी

पर छिके कौंरू कई वेझी चनेसर चाह मां
थी वञी केॾांहु हाणे, हुन चयो उत्साह मां

सोन वरनी दिल पसाए कींअ वञी थी हिंअ छॾे
ऐ सखी, छा लइ वञीं थी मूंखे गूंदर में गॾे

मूंखे लीला रात हिकिड़ीअ लाइ आ मोकल ॾिनी
मूंखे ॾियो पालण वचनु न त लेखिबसि कोझी किनी

दिल भॻल आलियुनि अखियुनि सां वई हली कौंरू परे
एतिरे में आई लीला वेसु ॿान्हियुनि जो करे

हूअ अकेली कान हुई, कौंरू बि तंहिं सां साणु हुई
पंहिंजे रजा ॾे वठी कौंरूअ खे आई पाणु हुई

ईंदे ई क़दमनि में राजन जे पई लीला किरी
होत! हारायो अथमि, आहियां जो हीरनि ते हिरी

मूंखे कौंरू! पंहिंजे सोने रूह जी इम्लाक ॾे
मां कंदियसि पछुताउ जेसीं दिल जो दामन पाक थे

लीलाए रीझाए शल मां पंहिंजो राजन खे करियां
शल चनेसर जे अॻियां नितु हार ॻोढ़नि जा धरियां!