भारत की संस्कृति के लिए... भाषा की उन्नति के लिए... साहित्य के प्रसार के लिए
ચોતરફ છે ઉઘાડ, જોઈ લે / રાકેશ હાંસલિયા
Kavita Kosh से
ચોતરફ છે ઉઘાડ, જોઈ લે,
નભનાં ખુલ્લાં કમાડ જોઈ લે.
ભીંત પાડે છે રાડ જોઈ લે,
આ વકરતી તિરાડ જોઈ લે.
છાંયડો શોધવા ક્યાં ભટકે છે ?
તારી ભીતર છે ઝાડ, જોઈ લે !
કેવી બેઠી છે વાડના ખભ્ભે !
બાળ-વેલીના લાડ જોઈ લે.
નિત કરે છે અસીમનું અપમાન,
તેં બનાવેલ વાડ જોઈ લે.
આ જગતનું નિદાન રે’વા દે,
તું પ્રથમ તારી નાડ જોઈ લે.
કેવો સોપો પડી ગયો ‘રાકેશ’ !
મૃત્યુએ પાડી ધાડ જોઈ લે.
