તું તને ખુદને ભૂલી જા એમ એને યાદ કર / જાતુષ જોશી

તું તને ખુદને ભૂલી જા એમ એને યાદ કર,
કે પછી જડમૂળથી એને બધેથી બાદ કર.

ફક્ત એ સૂણી શકે એવી રીતે તું સાદ કર,
મૌન ધારીને મુખર બન, એમ કૈં સંવાદ કર.

એકસરખો સ્નેહ તું સહુને કરે છે, ઠીક છે,
એક એની વાતમાં તું સ્નેહવશ અપવાદ કર.

આ હવાની લ્હેરખી એણે લખેલું ગીત છે,
આ હવાની લ્હેરખીનો તું જરા અનુવાદ કર.

ત્યાં સુધી તો બે જ રીતે પ્હોંચવું સંભવ બને,
રોજ એને પ્રાર્થના કર કાં પછી વિખવાદ કર.