"दो फाड़ / राजूराम बिजारणियां" के अवतरणों में अंतर

घर रै आंगणैं
डाइनिंग टेबल रै चारूंमेर
न्यारी न्यारी थाळ्यां में
नींव भरता
नित बणै
न्यारा निरवाळा घर!

घर फूटरा
घर सांतरा
भींत अेकल
बारणां आंतरा।

चाणचक...
जूनी छात बिचाळै आई तरेड़
छात रै खूणैं
धरी मटकी सूं
रीतग्यो पाणी
मेह रो
नेह रो
प्रीत पाळती
देह रो!

घर तो अजै है
न्यारा-निरवाळा
फूटरा-सांतरा
आंतरा-आंतरा

पण..केई जोड़ी आंख्यां
मूंडो फाड्यां जोवै
बिचाळै पड़ी
हुयोड़ी दो फाड़
जूनी छात नै।