"मै निर्धन-कंगाल, तूं राजा रायसिंह की जाई / ललित कुमार" के अवतरणों में अंतर

मै निर्धन-कंगाल तूं राजा, रायसिंह की जाई,
इस टुट्टी छान मै करूँ गुजारा, क्यूँ महल छोडकै आई || टेक ||

कित कंगले संग होली बीना, तनै सखी देंगी ताने,
तेरे बणखंड के म्हा पैर फुटज्या, लाग-लाग कै फाने,
उड़ै पीण-नहाण नै एक तला, आड़ै बण रे अलग जनाने,
मेरा अन्न-वस्त्र का टोटा सै, तेरै भरे न्यारे-न्यारे खान्ने,
थारै धनमाया के भरे खजाने, मेरै धोरै ना एक पाई ||

उड़ै बियाबान मै दुःख पाज्या, ना सुख महला आळे,
तूं राजा की राजकुमारी, मेरै संग झाडैगी जाळे,
तेरी दासी-बांदी करैं टहल, महल मै नौकर रहवै रुखाले,
टोटा-खोटा हो बुरा जगत मै, मेरे बख्त टलै ना टाले.
तेरे पिता नै कर दिए चाले, निर्धन गेल्या ब्याही ||

सोने की अठमासी बीना, बणखंड के म्हा जरया करैगी,
आड़ै छत्तीस भोजन मिलै खाण नै, बण मै भूखी मरया करैगी,
ओड़ै शेर-बघेरे भालू बोलै, बियाबान मै डरया करैगी,
दुःख पाज्या तेरी निर्मल काया, जब शीश लाकड़ी धरया करैगी,
तूं नैनां नीर भरया करैगी, तेरी कोए ना करैं सुणवाई ||

बड़े-बड़ेरे कहया करैं सै, ना टोटा किसे का मीत बीना,
हिणै कै घर सुथरी बहूँ, कोए खोटी धरले नीत बीना,
आग-पाणी का ना मेल बताया, तूं कितै ल्याई या रीत बीना,
गाम बुवाणी चली जाईये (चाली आई), करकै गुर्जर तै प्रीत बीना,
कहरया तनै ललित बीना, मत लावै (लुवावै) चाँद कै स्याही ||