"पानी / मौन आवाज" के अवतरणों में अंतर

जल्लादले मान्छे मारिसकेपछि
आफ्नो रक्ताम्य हात पानीले धोयो
जल्लादको हात सफा भयो
तर
पानी रक्ताम्य भयो !

रक्ताम्य पानी -
खोला / नदी र खोल्सामा बग्यो
छाँगा / छहरा र झरनामा बग्यो
बग्यो - समयको गतिशीलतामा
युगको अनन्ततामा ।

बग्दै / बग्दै एकदिन त्यो रक्ताम्य पानी
एउटा भिक्षुको अञ्जुलीमा आइपुग्यो
मन्दिरमा जल चढाइरहेको भक्तको हातमा आइपुग्यो
पितृलाई तर्पण दिइरहेको
एउटा अभागी छोराको हातमा आइपुग्यो ।

यसरी -
जल्लादले हत्या गरेको मान्छेको रगत
पानीमा मिसिएर जल्लाद कै मुखमा आइपुग्यो !


०००