"सुणै पित्तर / प्रमोद कुमार शर्मा" के अवतरणों में अंतर

"पित्तर निराज है"
मां जद-जद ई कैवे आ बात
घर री छात उपर
खिण्ड ज्यावै आखा!

ढूंढ ई ल्यावै मां
हांडक्या-कुळड़त्या सूं
ऐक रिपियौ चार आना
फेर बण जावै
गांव री मरियल सी दुकान रा
बोदा पतासा
परसाद म्हारै बूढ़ै थानां रो!
पित्तर निराज नीं होवणा चाइजै
मां कैवै-
भळ और सासीलाम!
दुगड़ी रे गूमड़ै मांय
नीं पडै़ राध!
बिछावणां मांय मूतै नीं
मोतियो!
सीधो काडूंली थारै नाम!

पण मां नी सुण सकै
पित्तरा रा ठहाका
लटकता घर री बूढी भींता सूं!
घर -
होळै-होळै
बदळ ज्यावै
पित्तरा रै देवरै मांय
पण
छेकड़ पड़ ई ज्यावै राध
दुगड़ी रै गुमड़ां मांय
अर निकळ‘ई ज्यावै मूत
मोतियै रो गूदड़ा मांय!
फेर ई
मानती रैवै मां
कै सो कीं ठीक कर देवैला
पित्तर महाराज!
अठै तांई कै
जीमण रै टैम
बापू रौ हथोड़ौ सो हाथ्
सेक ई देवै
किणी न किणी री पीठ।
माचै रोवा-कूकौ घर मांय
नाचैहै भूख च्यारूं कूंट
पण फेर भी
पित्तर जी उपर रैवे
मां री आस्था
अखूंट!