"कुमाणस काळ / कन्हैया लाल सेठिया" के अवतरणों में अंतर

किण री
कूख स्यूं
जलम्यो
ओ कुमाणस काळ ?
कुण है
ईं राममार्यै रा
मा’र बाप?
फिर पूछतो
सिस्टी रो
सिरजणहार
चतुरानन बिरमा,
गयो पैली
बिरमांड रै
पालनकर्ता
विष्णु कनैं
बोल्या लिछमीनाथ
मैं तो समइयो
तू ही रच्यो है
ईं कुबधी नै
फुड़ाणै वासतै
ठीकरो भूंड रो
म्हारै माथै पर,
सुण’र ओळमो
गयो पगोपग
डोकरियो
षंकर कनैं
देखतां ही
बीं नै
समझग्या
भोळानाथ
सा बात,
कयो, जायो
इण काळ नै
घणखाऊ
कामचोरां री
डकार,
बां री ही चुन्योड़ी
आज री सरकार,
फिरै है
जणां ही
खुल्लै सांड सो
ओ गुनैगार !