"दम्पति-प्रसंग / राजकमल चौधरी" के अवतरणों में अंतर

पति कोड़ि रहल अछि, कोनो प्रकारेँ...
अपन नाकसँ
माटि परम पथराह
नहुए नहुए कोड़ि रहल अछि!
पति जोड़ि रहल अछि, मुदा घटाक’
अपन आँखिसँ
वंशावलि कारी चश्मा हटा-हटाक’...
पहिने दैत अछि भाग; तकर बाद गुणा!
की कयल जाय,
सौ से गामक अधुना जीवन अछि एहिना
मरल साप सन!
पति जोड़ि रहल अछि, मुदा, मात्र पत्नी
दैत अछि भाग...
पतिक गुणनफलकेँ कहैत अछि,
-हा हन्त, हमर दुर्भाग!
एही पापसँ सदिखन कनैत अछि;
अपन नोरसँ
गील भेल आटा सदिखन सनैत अछि
पत्नी!

(मिथिला मिहिर: 5.12.65)