"શ્રુતિ પ્રગટો હવે / લલિત ત્રિવેદી" के अवतरणों में अंतर

આ સમાધિની ક્ષણો ,શ્વાસો,શ્રુતિ પ્રગટો હવે,
વેદની ઋચા સમી કોઈ કૃતિ પ્રગટો હવે.

શંખ ફૂંકું આ શ્વસનગંગોત્રીના નભ સુધી....,
નાભિમાથી શ્વાસની અંતિમ ગીતિ પ્રગટો હવે.

ચીપિયો ખખડે ને દ્વારો ખટખટે બ્રહ્માંડના ....,
કે ધખે બ્રહ્માંડ લગ ધૂણી ,દ્યુતિ ! પ્રગટો હવે.

ચર્મમાંથી મર્મમાં પ્રગટું...ચરમસીમા વટું.....,
હે સકળ અખિલાઇની ગેબી સ્થિતિ! પ્રગટો હવે.

આભમય એકાંતની ગહરાઈમાં બોળું કલમ...,
કે અગોચરનો અરથ અથથી ઇતિ પ્રગટો હવે.