"परिस्थितिक दास / नारायण झा" के अवतरणों में अंतर

हँ....! हम मनुक्ख छी
सर्वश्रेष्ठ प्राणी
हमरा लाज नहि
कहै सँ
सभ सँ बेसी गुण
सभ सँ बेसी शील
सभ सँ बेसी विवेक
लेने पृथ्वी पर
आयल छी।

ओ विवेक, पशुओ सँ
कम होइत चलि गेल
मुँह बन्न भ' गेल
जेना केओ जबरदस्ती
सीबि देने होअय
बिना कोनो ताग आ टाकु सँ।

देखैत रहि गेलहुँ
आँखि पथरा गेल छल
ओ क्षण मे छनाक होइत
एकटा करेज फाटि रहल छल
नोरे-झोरे नहायल आँखि
मुदि ई बैइमान ठोर
नहि पटपटेलक
नहि किछु बकार निकाललक।

अन्तर्मनक ध्वनि
झंकृत क' रहल छल
आत्माक तार केँ
बेर-बेर दोमैत छल
किछु बाजैक लेल
विवेक-शीलक लाज राखैक लेल
बेर-बेर यत्नरत रहल
मुदा एखटा आखरक
सहस्रांशो भाग नहि निकलल।

एकटा ओ हृदय
जे आनंदक अनुभूति केँ
आनंदक महापूल बान्हि रहल छल
तप्त हृदय सँ तृप्ति पबैत रहि गेल
जेना कण-कण तृप्तिक
आकांक्षा सँ बाट निहारैत छल।

केहेन परमादी छी
की केहेन छी निरीह
केहेन दुर्बल अछि समय
जे चौकठि सँ आगू
घोड़ा जकाँ लगबैछ लगाम
मनुक्ख छी वा
परिस्थितिक दास?