"बगरो / कुंदन अमिताभ" के अवतरणों में अंतर

हमरा घरऽ में
बगरो केरऽ बसेरा छै
फुर्र-फुर्र करतें
चहकतें रहै छै
कखनू मोखा पेॅ
तेॅ कखनू ओसरा पेॅ
कखनू कबूत्तर के भाँड़ी में
तेॅ कखनू अँगना में लागलऽ
लऽत पतारऽ में
नुका छिपी करतें रहै छै
पचासों बगरो के
एगो हूजूम
जेकरऽ बासऽ छै हमरा हाँ
पर काल्हू सें
निपता छै
कल भोरे जखनी
पाठा केॅ
बलिदान दै लेली
नहबाय सोहनाय केॅ
गोसाँय लगाँ
लानलऽ गेलै
तखनी तालुक तेॅ छेलबे करलै
जेन्है पाठा के गरदन पेॅ
काता चललै
लहू केरऽ छींटा
छितराय गेलै सगरे
अँगना में
धड़ सें कटलऽ गरदन
बाय में छटपट करेॅ लागलै
तखनियें
बगरो केरऽ हूजूम
अँगना सें उड़ी केॅ
जे फुर्र पार होलऽ छै
अखनी ताँय
नजर नै ऐलऽ छै।